Góð landkynning flughetju
Þegar hún var spurð við heimkomuna hvað henni væri minnisstæðast nefndi hún enn á ný hve Ísland væri stórbrotið og ógleymanlegt væri að fljúga yfir New York-borg.
Zara Rutherford, 19 ára, lenti eins hreyfils Shark UK-flugvél sinni á Kortrijk-flugvelli í Belgíu fimmtudaginn 20 janúar 2022 eftir að hafa flogið umhverfis jörðina á 155 dögum, tveimur mánuðum lengri tíma en hún ætlaði. Veður tafði hana á ferð hennar auk þess sem vandræði urðu vegna vegabréfsáritana.
Hún hóf flugferðina 18. ágúst 2021 og flaug alls 51.000 km, hafði viðdvöl í 41 landi í fimm heimsálfum. Vegna afreksins kemst Zara í Heimsmetabók Guinness og ýtir til hliðar bandarísku konunni Shaestu Waiz sem átti fyrra metið sem yngsta konan til að fljúga í kringum jörðina en það gerði hún 30 ára 2017.
Í fyrra flaug 18 ára Breti, Travis Ludlow, einn umhverfis jörðina. Hann er yngstur allra til að fara hringinn á eins hreyfils vél, 2001 Cessna 172R. Ferð hans tók 44 daga og var 40.072 km.
Ludlow hóf ferð sína í austur yfir Evrópu, Rússland og síðan yfir Bandaríkin, Kanada, Grænland, Ísland, Skotland og til Hollands þar sem hann lauk fluginu.
Zara Rutherford á Reykjavíkurflugvelli 19. ágúst 2021 (mynd visir.is).
Zara Rutherford fór hinn hringinn, það er í vestur og lenti á Íslandi á fyrsta degi ferðar sinnar, 19. ágúst 2021. Þá hélt hún að flugi sínu lyki hún á tæpum þremur mánuðum 4. nóvember 2021 en þeir urðu fimm.
Á visir.is birtist 19. ágúst mynd af Zöru á Reykjavíkurflugvelli og stutt viðtal þar sem hún segir flugið yfir Ísland hafa „verið stórkostlegt“ og bætir við:
„Ég flaug yfir eldfjallið og það var magnað. Ég hafði stórfenglegt útsýni. Ég held að þetta sé eitt fallegasta land í heimi.“
Þegar hún var spurð við heimkomuna hvað henni væri minnisstæðast nefndi hún enn á ný hve Ísland og eldfjallið hefði verið stórbrotið auk þess sem ógleymanlegt væri að hafa flogið yfir New York-borg.
Zara flaug sjónflug og varð því að laga sign mjög að veðri og vindum. Hún hefði verið hætt komin vegna eldinga við Singapúr, ókyrrðar í loft yfir Búlgaríu og skógarelda í Kaliforníu.
Afreks Zöru Rutherford er getið í öllum helstu fjölmiðlum heims og sjónvarpsstöðvar austan hafs og vestan birta frásagnir af afreki hennar. Góð landkynning!