Rangar heimfærslur
Við skilning á því sem allt í einu verður efst á baugi hér auðveldar oft að hafa þessi hnattvæðingartengsl í huga.
Á tímum hnattvæðingarinnar þegar flæði upplýsinga er takmarkalaust og auðvelt að lifa sig inn í stjórnmáladeilur og átök um heim allan gætir þess í vaxandi mæli að menn heimfæri vanda í einu landi upp á eigið land.
Það er sérkennilegt að talið sé réttmætt að herma eftir þessum frönsku mótmælendum hér á landi. Ber fyrst og síðast vott um skort á sjálfstrausti.
Þessi fullyrðing skal rökstudd með þremur nýlegum dæmum:
- Vaxandi óvild í garð Brusselmanna víða innan ESB og deilurnar í Bretlandi um úrsögn Breta úr ESB setja svip á umræður um aðild að EES-samstarfinu hér á landi. Ofsafengnar túlkanir á efni 3. orkupakkans og áhrifum hans hér eru í engu samræmi við það sem í skjalinu segir. Andstæðingarnir eru jafnframt undir sterkum áhrifum frá hópum í Noregi sem urðu undir í deilum um orkupakkann þar. Að líkja stöðu Norðmanna og Íslendinga saman þegar rætt er um útflutning á raforku stenst ekki.
- Á vettvangi Sameinuðu þjóðanna hefur árum saman gilt samningur um réttarstöðu flóttafólks. Lengi hefur verið að því unnið að þjóðir heims sammæltust um réttarstöðu farandfólks. Samþykkt um það efni er nú á lokastigi innan Sameinuðu þjóðanna. Þar eru sett 23 markmið og í texta meginmáls er að finna hátíðleg fyrirheit um hvernig unnið skuli að framkvæmd þeirra án nokkurra lagalegra skuldbindinga. Ekkert af því sem segir í þessari samþykkt hróflar við íslenskum lögum. Engu að síður eru höfð uppi stór orð um svik íslenskra stjórnmálamanna, einkum sjálfstæðismanna, í málinu! Í umræðum um það eru heimfærð atriði sem snerta Íslendinga ekki neitt vegna legu lands þeirra.
- Sumir láta hér eins og ástæða sé til að grípa til samskonar aðferða við að koma skoðunum sínum á framfæri og gulvestungar gera í Frakklandi. Þeir sem þannig tala átta sig ekki á frönskum baráttuhefðum, muninum á aðferðum hér og þar við lausn ágreiningsmála um kaup og kjör eða þróun lífskjara í stöðnuðu frönsku hagkerfi.
Við skilning á því sem allt í einu verður efst á baugi hér auðveldar oft að hafa þessi hnattvæðingartengsl í huga. Við þeim verður ekki hróflað nú frekar en við tengslum Íslendinga við umheiminn í aldanna rás. Galdurinn felst hins vegar í því að greina hvað skiptir máli miðað við íslenskar aðstæður og hvað ber að láta fljóta áfram án þess því sé beitt á neikvæðan hátt án minnsta íslensks tilefnis.